صياد لمعاني
شكيت طريق لحصيدة
جدمني شوك بلايا وغوايتي
خُرجي يا مولات لقصيدة
وعطفي حليبك في دوايتي.
كولي انت اختي
وف الحرفة حبيبتي
أنا منك
وانت مني قصيدة ومعاني
تكولي حروفك ضاربة مني
يا عنوة يا عمدة يا بلعاني.
كولي يا مجدوبة
واش هادوك ذراوعك ملاح
اولى ريشات من جناح
تكتب في كل عشية وصباح..؟
صياد لمعاني يلكاها.. يلكاها
احني الراس
يا جبال الأطلس، باغي نلكاها.
هاذ السرة
وجات في كودها
وهاذ الحرة
آش من صواب يكودها
وتقبل كيادي..؟
عودة ، ملطة ، حرانة،
كيف تردف..؟
وكيف تعكال..؟
الله يرحم من كال
كال.. كال.. كال
{لمحبة بالخاطر، ماشي بالسيف}
أنا ثوبك يا لالة
ماشي مكتوبك
عا ثوبي يا لالة فضفاض
وقشابتي واسعة
زاد جمرك زهر وزناد
انا في حماك يا الوالعة.
والله من بهاك يا زينة لبها
ايلا ريقك وصل وانا صايم للها
دزت في حكام واحد شاف الزين وفها
سبحان اللي ما ينام ولا يسهى.
العين صافية تكول غدير
ماها حلو
فايض من ساكية
وكاب في بير،
خليني نرش ماك علي
كمال وضويا لكبير
ويلا مسحتيه مسحتي لاجر
ومسحتي الخير والخمير.
سدي باب القبة
وخلي الحال مظلام
حُلي خبال الكُبة
ونشي علي لكلام
طلقي روايح، بخور، وشبة
تروى قوافي هاد العام.
غواني لفضول
وطليت من تاقة
نشوف لحريفات سبول
ونبكي على حصايد ايامك اللي باقا.
ايلا كنت نون ، انا باسك
نقرة فين يغبر نحاسك
عزلي يا مرأة، فين يطيب نعاسك
انت حرة ، دفني فيا عيشور هواسك
انا ناسك.. وباسك..انا لباسك.
هاك الطين
هاك الطين
وصاوب سواري
يمكن توقف الهمة.
صُلاح الدين
ما لقيتهم في جواري
زادوني غمة على غمة.
فين وفين
عادا يكمل ملياري
وتوحد الكلمة هاد الأمة.
فلسطين
فلسطين يا عرابين
عاري عليكم هاد القمة.
بكات العين
وكتب التاريخ خباري
دين يا عرابين وبقى في الذمة.
غزة وجنين
يا لخليل هاد الريحة من اريحا،
رام الله هاد الشهيد
وانت شاهد ومشاهد
جاهد جدك كان مجاهد
ها دمُو في الراية.
هو رام الله
وانت باش فادتك لقرايا
ايلا ما عرفت القدس
ما شرقية، ماغربية
القدس يا عالم .. يا هوه عربية
نقط ع لحروف
آجي نحطوا النقط ع لحروب
دمعة من جهة الغالب
ودم جهة المغلوب
كلها يضرب على جهد قياسو
وتيقو في التراب
خليوه يعزل ناسو
يزرعهم في حصيدة
يرويهم من ماه
يسقيهم من سماه
ينظمهم في بحور لقصيدة
لبنان …هو نزار…هو جبران
هو فيروز …هو وديع …هو غسان
لبنان
ماشي واد يجري بدم الصبيان
ماشي روضة ، ماشي قبر
ماشي فرينة ، ماشي جمر
وماشي كعقول نسكتو اكثر
هو اكبر …هو اكبر…هو اكبر
يا أمة الله اكبر .
الجمعة يونيو 20, 2014 10:20 pm من طرف 
موضوع: صياد لمعاني 
